Er det mogleg....

....kan det henda at Vårherre er Uskedøling?? Glad i oss må han no vera, det er sikkert og visst! Etter at det har regna og blåse non stop i fleire veker, er det jo nesten for godt til å vera sant at vi skulle få så flott vêr som vi fekk i kveld når den årlege julemarknaden gjekk av stabelen. Eg trudde jo nesten ikkje mine eigne augo når eg såg ut vindauga på jobben i dag tidleg og såg at snøen lava ned. Tiddelibom - humøret steig fleire hakk :-) Mi oppgåve på julemarknaden i år, som alle andre år, var å vera Lappekakeguri i teltet. Eg kjem storst sett heseblesande med lappekakerøra mi rett før det heile brakar laus, men det plar ikkje vera så farleg, for dei andre flinke Damevennene har alt under kontrol. Så, presis kl. 17.00 (trur eg - eg kikka igrunnen ikkje på klokka):

Blei lysa på Grana tente, medan Musikklaget spela både vel og lenge. Jepp, då blei det julestemning i Uskedalen. Det såg ut som om folk kosa seg i år òg. I teltet gjekk lappane unna, og når det byrja å bli tomt for folk, var det òg slutt på lappekakerøra.  Juleneka gjekk unna dei òg :-) Ein annan som sjølvsagt var på plass var:

Børsdalsnissen! Alltid lika poplær blandt dei minste - eg tenkjer han hadde med seg noko godt i sekken sin i år òg.

Og så, etter ein god time og litt til var det på tide å pakka saman sakene sine igjen. Teltet blei pakka ned akkurat i tide - ein halv time seinare så hadde det vel blåse ned av seg sjølv. For i det vi avslutta julemarknaden byrja vinden å ta seg kraftig opp att.

No sit eg her i sofaen med pizza, cola, Se og Hør og Idol medan vinden uler rundt hushjørna,og er supernøgd med årets julemarknad:-)

Vel blåst alle saman!